varthairasanaimoongilmoochu

 

‘எழுத்தும், எண்ணமும்,’ குழுமத்தில்தான் முதன்முதலில் விளையாட்டாக எழுதத் தொடங்கினேன். அந்தக் குழுமத்துக்குள் என்னை வலுக்கட்டாயமாக இழுத்துச் சென்று எழுத வைத்தவர் நண்பர். பி. கே. சிவகுமார். பின்னர் சிவகுமாரும், கோபால் ராஜாராம், துகாராம் சகோதரர்கள் உள்ளிட்ட நண்பர்கள் இணைந்து துவக்கிய ‘வார்த்தை’ சிற்றிதழில் ‘எழுத்தும் எண்ணமும்’ குழுமத்தில் நான் எழுதிய சில கட்டுரைகள் போக இன்னும் பல கட்டுரைகள் எழுதினேன். அவற்றில் முக்கியமானதாக நான் கருதுவது, ‘யுகசந்தி’. ‘வார்த்தை’ சிற்றிதழில் என் கட்டுரைகளைப் படித்து விட்டு தொடர்பு கொண்டவர்களில் முதன்மையானவர் காலம்சென்ற தி.க.சி. தாத்தா. “வே! எங்கலே இருந்தேரு இத்தன நாளா?”

‘வார்த்தை’ சிற்றிதழின் ஆசிரியர் ஐயா பி.ச. குப்புசாமி தொடர்ந்து ஊக்குவித்தார்.

‘நான் திருநவேலில பிறக்கலியேன்னு ஏங்க வைக்கறீங்களே, சுகா!’

“சுகா, ‘வார்த்தை’ல எளுதறீங்க. ஓகே. அதையெல்லாம் இணையத்துல ஒரு பிளாக் ஓப்பன் பண்ணி சேத்து வச்சா, அது ஒரு டைரி மாதிரி காலத்துக்கும் இருக்கும்,” என்று சொல்லி எனக்கான ஒரு வலைப்பூவைத் துவக்கி அதுவரைக்கும் நான் எழுதிய கட்டுரைகளை அந்த வலைப்பூவில் இட்டு சேமிக்கத் தொடங்கினார், நண்பர் மனோ. பெயர் மட்டும் ‘வேணுவனம்’ என்று நான் வைத்தேன்.

பிறகு தம்பி சேதுபதி அருணாசலம் ‘சொல்வனம்’ மின்னிதழ் துவங்க இருக்கிற விஷயத்தைச் சொல்லி அதில் தொடர்ந்து எழுதச் சொன்னார். ;வார்த்தை’யில் ஏற்கனவே பிரசுரமாகிய ‘திசை’ கட்டுரையுடன் சொல்வனம் முதல் இதழ் வெளியாகியது. இதற்கிடையே ஆனந்த விகடன் ஆசிரியர் நண்பர் இரா. கண்ணன் விகடனில் தொடர் எழுதச் சொன்னார். அதுதான் ‘மூங்கில் மூச்சு’. முப்பத்து மூன்று வாரங்கள் விகடனில் எழுதிய பிறகும், தொடர்ந்து ‘சொல்வனம்’ மின்னிதழில் எழுதி வந்தேன். வருகிறேன். “‘வார்த்தை’ இதழில் வெளிவந்திருந்தாலும் பரவாயில்லை, நாங்களும் எங்கள் பத்திரிக்கையில் பிரசுரிக்கிறோம்,” என்று நான் எழுதிய கட்டுரைகளை தமது ‘ரசனை’ பத்திரிக்கையில் தொடர்ந்து பிரசுரித்தார், சகோதரர் மரபின் முத்தையா. இப்போது ‘வேணுவனம்’ கட்டுரைகள், மற்றும் ஆனந்த விகடன் இதழில் நான் அபூர்வமாக எழுதுகிற சிறுகதைகளை இட்டு சேமித்து வைக்கிறார் நட்பாஸ் என்கிற பாஸ்கர் என்கிற ‘பதாகை’ பாஸ்கர்.

இதுவே நான் ரைட்டரான ஹிஸ்டரியும், ஜியாக்ரஃபியும்.

3 thoughts on “ஹிஸ்டரி, ஜியாக்ரஃபி…

  1. நீண்ட நாட்களுக்கு பிறகு சுகாவின் வேனுவனத்தில் ஓர் அலையல்.

    கடந்த வாரம் தங்கள் தந்தையின் சொற்பொழிவை கண்டு கேட்டு பெற்றேன், பாரதி விழா சிங்கை.
    பரந்த தமிழ் சாரல் அனுபவத்தை தூவிசென்று நிறைவில் சட்டென்று கண்களை பனிக்க செய்தார்.

    அவரின் பேச்சின் கட்டமைப்பு சாயல் உங்களின் எழுத்தின் கட்டமைப்பில் தெரிவதில் வியப்பில்லை.
    John sundar சொந்த ரயில்க்காரி புத்தக வெளியீட்டு விழா பற்றிய கட்டுரை, உதாரணம்.

    இதோ இந்த ஹிஸ்டரி ஜியாக்ரபி குறும்பு கூட.

  2. நீண்ட நாட்களுக்கு பிறகு சுகாவின் வேனுவனத்தில் ஓர் அலையல்.

    கடந்த வாரம் தங்கள் தந்தையின் சொற்பொழிவை கண்டு கேட்டு பெற்றேன், பாரதி விழா சிங்கை.
    பரந்த தமிழ் சாரல் அனுபவத்தை தூவிசென்று நிறைவில் சட்டென்று கண்களை பனிக்க செய்தார்.

    அவரின் பேச்சின் கட்டமைப்பு சாயல் உங்களின் எழுத்தின் கட்டமைப்பில் தெரிவதில் வியப்பில்லை.
    John sundar சொந்த ரயில்க்காரி புத்தக வெளியீட்டு விழா
    பற்றிய கட்டுரை, உதாரணம்.

    இதோ இந்த ஹிஸ்டரி ஜியாக்ரபி குறும்பு கூட.

Leave a Reply

Your email address will not be published. Required fields are marked *